Kupang-TAKLALE.COM, Kota Kupang ni su ada sejak lama ee. Dari Jaman VOC cikal bakalnya india benteng Concordia yang tentara dong tinggal sakarang di atas batu piak di pinggir laut dekat Teddys tu. Dia pung carita bagini:
VOC Balanda datang partama di kepulauan Timor ni taon 1613. Dong usir buang Portugis yang su duduk di Solor dar taon 1556. Portugis sabanarnya su datang di Solor tahun 1511 waktu dong rebut Malaka. Cuma baru taon 1556 dong bangun itu benteng di Solor untuk lindungi dong pung diri dari orang Solor dong yang su muslim sabalom dong datang.
Tau-tahu VOC datang dibawah pimpinan Apolonius Schotte dan setelah dong kepung Portugis beberapa bulan akhirnya dong rebut itu benteng dan dong kas nama Fort Henricus dan Portugi dong lari pi Larantuka, saparu pi Makasar.
Itu benteng bapindah tangan ke maen gala asin sa. Sabantar portugis rebut sabantar Balanda ambel. Karna Portugis son lari jaoh jaoh hanya di Larantuka sa. Larantuka dg Solor badeka to?Bahkan kadang-kadang orang Balanda dong desersi pi Portugis. Salah satu contohnya marga Hornay dong. Itu turunan dari orang Balanda yg desersi pi Portugis, dia pung nama Jan de Ornay.
Akhirnya karena mangkali dong rasa Solor su kurang strategis, Belanda lari kastengah itu benteng ko pindah di Kupang taon 1653 waktu ada gempa kas rusak itu benteng. Gempa di Flores ni tau to.
VOC sebenarnya su datang duluan di Kupang taon 1613 ju tapi waktu itu Raja Helong yang dudu di Kupang tawar tanah untuk bangun benteng denga tawar diri maso Kristen, Belanda son nodek. Dong mas lebe suka nanuuk di Solor.
Gara-gara itu ada rahib Portugis Dominikan satu nama Antonio de Sao Jacinto ame kesempatan di tahun 1647 untuk terima tawaran raja Helong. Dia bangun satu benteng kici di benteng yang sekarang. Cuma dia bangun sandiri, son ada orang Portugis yang bantu dia. Pastor-pastor Portugis di Larantuka dong marah dia ko kastengah dia kerja sandiri.
Su kerja susah-susah, Belanda nere-nere datang. Dong rebut itu benteng di taon 1653 tanpa satu tembakan meriampun. Ko Jacinto sendiri na. Akhirnya Balanda kas nama itu benteng dengan nama Concordia yang kotong tahu sekarang ini.
Cuma Balanda hanya dapa tanah sapotong di itu benteng sa. Di luar itu samua su ada yang merajalela yaitu Portugis Itam atau Topass. Dong bikin ame Belanda son kaluar main-main di luar Benteng. Raja-raja sekitar dong kena pengaruh terutama raja Amarasi. Karena dong kurang parcaya diri dan pana’u deng Portugis Itam pung makan puji di Timor ni, waktu datang dari Solor dong piko bawa dong pung kawan Solor sat kampong ju. Dong taru ini orang Solor dong deka-deka di luar benteng untuk jaga dong. Itu kampong orang Solor itu india yg sakarang kotong sabut Kampung Solor di kota tua ni.
Baru tiga taon di Kupang yaitu taon 1656 dong coba usir buang Portugis Itam dong. Dong pange ame dong pung jendral paling jagoan itu waktu yang taklukkan Ambon. Dia pung nama , Arnold de Vlaming van Oudshoorn. Dong pange ini jendral jauh-jauh dari Ambon dengan Kapten Jongker yang terkenal untuk usir Topass di Amarasi. Tau-tau penakluk Ambon kalah di Amarasi bro, sis. Portugis Itam dengan orang Timor dong usir bawa sang dong lari salah-salah dari Amarasi. Dong mati banyak.
Setelah itu jendral bangun lari, dia kasi salah dia pung sekutu orang Timor dong bilang dong son bisa baparang, juga dia kasi salah sekutu orang Solor dong. Akhirnya dia usul ko benteng Concordia pindah pi Termanu di Rote sana. Tapi itu rencana sonde pernah terlaksana padahal gambar benteng su jadi. Bet pernah liat itu peta rencana benteng di Arsip Nasional Belanda.
Akhirnya selama saratus tahun dong satu tunggu satu sa. Belanda son bisa dapat usir dari Concordia, Portugis Itam ju tetap berkuasa di pedalaman Timor bikin was-was Balanda setiap saat.[Basambung e]
ditulis oleh Matheos Viktor Messakh pada laman Facebooknya tanggal 15 Agustus 2019
